這馬敢有檨仔通抾(khioh)
這馬敢有檨仔通抾(khioh)？ 做兵進前幾落個月，對(tùi)阮老爸(lāu-pē)佇楠西做工事，山頂所在攏檨仔咧蹛，厝誠(chiâⁿ)少。 有一戶人家自從豬無飼了後，彼間磚仔鞏的豬牢攏牛咧蹛，頭家欲省錢毋搭工寮，佮彼個阿伯仔參詳，牛蹛外口，豬牢讓阮蹛，整理整理ē就(tiō)也四序，比阿伯仔怹兜半磚的舊厝閣較堅固。 初初的時，規間寮仔攏是牛製造的青草香味，透濫土味，毋知是牛身軀的味，抑是阮衫仔的味。 四序是四序，毋過逐日轉來經過牛的身邊，伊攏會哞 (mô͘ⁿ)一聲誠大聲，毋知是咧問食飽未，抑是咧講我歹命，厝讓恁蹛，我蹛外口，逐暝草蚊仔叮較睏袂去，害阮攏歹勢歹勢。 彼當時下晡定定會落雨，熱天雨衫穿袂牢，頻(pîn)若落雨，阮就佇檨仔跤覕雨，搖檨仔抾來食(chia̍h)。 昨暝毋知啥人佇遐(tī hia)一直搖，阿這馬抑毋是檨仔咧出的時，敢有檨仔通抾？按呢搖，毋知彼間豬牢敢擋會牢？ 記2025年1月21楠西地震