台語按怎講 - 來學台文 Tâi-gí án-nóa kóng - lâi o̍h Tâi-bû

自從幽靈馬車失去影跡 武林漸漸恢復平靜 經過數十年 江湖又出現一台幽靈鋼琴 佇無意中一時琴聲大響 眾人被移形換影ê音符包圍 在迷醉中間 暴其然 變換弦律 射出閃光 一時陣金光強強滾  變換作Merry Xmas ê劍光 滿天瑞氣千條 四界光焱焱

散瞳劑 (sòaⁿ-tông-che)

奧援 o͘-iàn 前一站仔，柯文哲揣舞團扮作空服員跳性感舞齣，予人講侮辱女性；華視台語新聞講「chàn-siaⁿ贊聲」，民視台語新聞講「chō͘-tīn助陣」，攏無唸出「應援團」這句話的台語音。 「应援团」おうえんだん(oo-en-dan)是日本傳統的體育支援團體，華語直接借用漢字「應援團」，台語 o͘-iàn奧援，借用日語的音，是支持的意思，選舉捐款嘛會用o͘-iàn來表示。毋過，iàn愛讀第3聲，無就變作o͘-ian烏煙，就o͘-iú烏有去囉。 註1：(教會)白話字羅馬拼音o͘，教育部羅馬拼音oo

 少年ē借我扞一下 捷運車廂kheh(擠)甲實櫼櫼 (cha̍t-chiⁿ-chiⁿ)，人插插插，門欲關矣的放送(hòng-sàng)聲煞，gih-gih-gih-gih gih-gih-gih-gih一直陳，一個歐巴桑雄雄對門縫櫼(chiⁿ)入來，大家移徙(î-sóa)腳步，閣再揣腳徛的所在，歐巴桑轉踅身tńg-se̍h-sin)，手摱(moa)佇一個少年囡仔的肩胛頭，真細膩(sè-jī)講「借我扶一下」(予我扞hōaⁿ一下)，少年仔翻頭看一下，隨閣越頭。

  顏拉斯橐仔抑是塑膠袋仔 禮拜日，看著厝內囥傷濟塑膠橐仔，毋是我雜膜cha̍p-mo͘h抑是抾拾khioh-sı̍p，干焦kan-na吃飽傷閒爾爾，就想欲窮窮款款咧，共逐个橐仔捽予平，拗做四角形。啥知捽傷大力，聖聖siàⁿ-siàⁿ手指頭仔拄好摃到水槽，疼丟丟，隔工腫歪歪。 雄雄想著，阮阿母不是攏講顏拉斯橐仔gân-la-suh lok-á 嗎？我啥麽時陣綴人講塑膠橐仔，閣較濟人講塑膠袋仔，龜孤(Google)一下，閣有人講怹阿公阿媽講是玻璃紙。今taⁿ就是日語的ガラス（Garasu），英語的glass，精差就是照意思抑是照口音翻譯。 台語佮台灣的命運相仝，400年來，受著移民的多元性作用，閣幾十冬就換一个外來政權管，透濫無仝款的話，是真正常的結局，這才是正港的台語，嘛是咱講台語不是閩南語上大的根據。 毋過佇台語復興、重時行sî-kiâⁿ的當中，一寡前輩，磕袂著就為著欲用教育部的台羅拼音，抑是用教會羅馬字拼音；寫字欲用全羅馬拼音，用全漢字，抑是漢字佮羅馬拼音濫做夥用，佇遐相諍。甚至為著用詞有夠單摘toaⁿ-tiah(道地)無，佇遐計較。 來台北讀册、吃頭路已經欲40冬阿，離鄉無離腔，講話猶原台南腔，毋過一寡話語早就濫著北部腔，甚至華語化，就像較早的台語，變做漳泉濫。 想著有一擺佮李前總統對演講稿，伊問我啥麼是「發現」，伊攏講「發見」；有當時仔伊會直接佮我黜臭thuh-tshàu (吐槽)，這恁台南人才按呢講，北部人無按呢講。 毋管安怎講，在我來講，大家攏來講台語、寫台語上重要啦。欲講顏仔斯囊仔抑是塑膠袋仔，攏會通啦。

  恁講kong豬ti抑豬tu？ 佇學台語的當中，因為腔口無仝的緣故，語詞、講法會無仝。 比如招宜蘭人去食冰，伊干焦kan-taⁿ欲食霜仔，平平一隻豬ti（蜘蛛的蜘），偏偏有人講豬tu(蜘蛛的蛛)。 請問：恁講kong豬ti抑豬tu？ 雙關語變做「恁公kong豬ti抑豬tu」，所以若有人問我，我攏應：阮公是郭亮公。 創治。

  寫台語定著愛學羅馬拼音，除了漢字無法度寫出濟濟的台語音以外，閣有腔口的問題。 比如咱想欲吹電風(chhoe-tiān-hong)、去菜市仔(chhài-chhī-á)買紅菜(âng-chhài)。 若是去關廟、歸仁，頭家佮你紹介，會講這支電風真好衰(soe)，買轉去衰五年、衰十年，猶咧衰 。阿你若袂買翁婿(âng-sài紅菜)，就去頭前的賽匙仔(sài-sî-á菜市仔)。

  台北城內的糞埽桶pùn-sò-tháng 昨昏坐捷運 tsia̍t-ūn 對台大病院站出站，盤過pôaⁿ-kòe 228公園，佇懷寧街出口，看著真濟人咧排列買早頓chá-tǹg，一時心適，鬥鬧熱，綴人排。 彼he黃牙仔黃牙、燒燒軟㽎㽎nńg-sìm-sìm的蛋餅，外緣脆脆，像肉紙，捏tīⁿ一下就碎sùi去，蛋佮蛋餅皮的芳味，衝出來chhèng--chhut-lâi，芳貢貢，貢貢香。 一時飫燥iau-sò，咬一喙，（食丘）（食丘）khiū-khiū ，綿綿綿，青蔥噗pok一下，佇喙內彈開去，jui-sí阿 jui-sí(juice)，烏伊始o͘-i-sí（おいしい），一喙紲一喙，三兩喙 saⁿ-nn̄g chhùi，捽sut了了。 欶suh一喙豆奶tāu-ni，袂傷泔ám嘛袂傷洘khó，我上愛的焦香味，冰冰涼涼，甘甜阿甘甜，濫喙瀾水吞落去，規个心涼脾土開pî-thó͘-khui ，做一睏，欶佮焦焦焦ta-ta-ta、罩罩罩tà-tà-tà。 提the̍h一腳顏拉斯橐仔糞埽，入去公司擲敢若無啥好，城內踅過一輪閣一輪，今害仔taⁿ-hāi-á，就是揣無糞埽桶。 早起chái-khí佇北門口看到規排的糞埽桶，塔城街頂頭、忠孝西路頂頭、中華路頂頭，排規列，一個接一個，攏是糞埽桶。才知，彼台北市政府就是糞埽桶，攏抾抾khioh-khioh做一夥。

  秋清 用漢字寫台語，有當時仔字佮音鬥袂起來。第一擺看到秋清，叫是生份字，攏唸作秋天的秋，清水的清，秋清chhiu-chheng。 昨昏佇陳雷老師的《鄉史補記》，才看著注音秋清 chhio-chhìn，𪁎雞角的𪁎chhio，秤頭的秤chhìn 。 就是自細漢定定聽到的chhio-chhìn，呔是chhiu-chheng，無細膩閣會唸做手銃chhiú-chhèng，就愛拚輸贏，秋清袂起來阿。 熱天日頭赤焱焱chhiah-iāⁿ-iāⁿ，中晝時仔熱沸沸joa̍h-hut-hut，來去樹仔腳納涼nah-liâng，較秋清。

  買菜學台語 透早去阮兜巷仔口買菜，買一周西瓜，撩皮切做二橛，頭家娘看我欲囥落去茄芷袋仔內底，講：「這脆脆，寧可另外提，較袂硩著」。 lêng-khó͘寧可。足久沒聽到阿，寧可寫落來，較袂閣袂記。

  五日節gō͘-jı̍t-cheh 欲講五日節進前，愛講4月26。4月26是我的契爸(khè-pē)的大兄，就是大伯的聖誕，阿母早起會𤆬我去南鯤鯓佮大伯祝壽，才閣去阮外嬤的外家-蚵寮，去前廟拜我的契爸-池王。 比起後廟-南鯤鯓廟，契爸的廟-保安宮較清幽，袂傷吵，會當衲涼歇喘，順紲去倒手爿邊的菜市仔食點心，後廟的食物(chia̍h-mı̍h)貴閣歹食，俗話講：「北港貴香佮金，南鯤鯓貴點心」。 在我來講，4月26是一冬上熱的彼工，日頭赤焱焱(chhiah-iāⁿ-iāⁿ)，點仔膠路燒炥炥(sio-hu̍t-hut)，熥(thang)過球鞋燒對腳底起來。透中晝，外口賰來割香拜拜的人，閣有鹽埕收鹽的人，以早舅公講做鹽攏悾的，便若(piān-nā)日頭當猛(mé)、抑是落大雨，人攏走--入來，怹(in)攏走--出去。 過了4月26，定定會落大雨，一落幾若工，西瓜若無趁雨前緊挽起來，就會爛去。挽起來的西瓜疊(thia̍p)佇棚仔跤，逐日愛巡，共小可釘點欲爛去的西瓜揀出來，若無爛去流湯，(黑毛)著（tò͘--tio̍h)，就會愈爛愈濟；按呢，肉粽節就變做西瓜節，有食袂了的西瓜。

 艶遇iām-gū 伊穿一軀全烏的連衫短裙，坐帶窗前長條的膨椅頂懸，向佇細細張的圓桌仔咧揤ai-phe̍h (ipad)，裙勒懸懸，拄好嵌著尻川，腳若放落來，內褲摠仔(lai-kho͘-cháng-á)就看現現，嘛是太平洋深深袂見底的烏色，我咧揣位，沒細膩去共眼--著，伊若像有意識著，小可仔共我瀳--一下，彼圓圓輾輾的目睭，白仁比烏仁較濟，我頭隨斡開，毋敢佮伊相咬目，伊的正跤隨袚過倒跤，袂輸兩支白白白(pe̍h--pe̍h-pe̍h)剝殼的跤白筍相疊，我毋敢閣看，佇伊的斜對角坐落來，提彼本《艶遇》的小說出來看。

 歹厝邊pháiⁿ chhù-piⁿ 早起，高鐵自由座，賰無規位，一个雙人座，一个高長大漢ê 歐吉桑，彼中國ê時報褫佮開--開-開，雙跤展佮大--大-大，一人佔欲兩ê位，姑不將，去坐三人座的中央。 到板橋，一個少年家上車，坐伊邊阿，老伙仔，一直用報紙去嵌少年ê面。好佳哉。俗語講：「千金買厝，萬金買好厝邊」實在有影。

  毛毛仔雨 沓沓仔霧去 日頭若出來 霧就消去 雲也無去 天就光起--來 佇blue ê 禮拜一 聽候 霧霧ê心  聊聊仔 清起--來 mn̂g-mn̂g-á-hō͘ ta̍uh-ta̍uh-á bū-khì jı̍t-thâu ná chhut-lâi bū to̍h siau-khì hûn iá bô khì thiⁿ to̍h kng-khí--lâi tī pu̍t-lú ê lé-pài-it thèng-hāu bū-bū ê sim liâu-liâu-á chheng-khí--lâi

  下身(ē-sin)涼涼，今害(taⁿ hāi)，就是拉鍊裂(lı̍h)去。哉在，外疊(gōa-tha̍h)崁著，才(chiah)無卸世眾(sià-sì-chèng)。 禮拜日，提(the̍h)去菜市仔予(hō͘)人換。想講落(làu)一下阿台語，問姐仔，敢會使換jiak-kuh（遮巨），姐仔講，你是幾歲人，呔(thái)會曉講jiak-kuh。我台南人啦。 復興台語，愛靠台南人啦。紹介阮台南妹仔的迷眾頁(粉絲頁)，予大家看。 註：jiak-kuh，外來語，日語チャック(chakku)，現代語叫拉鍊(la-liān)

 風篩來矣！hong-thai lâi--ah！ 學台語借用漢字是上符合台灣人學習語言ê方法，但是台語是聲調性ê語言，單用漢字無法度表達出台語ê聲調，加上漢字定定是一字多音，閣較增加台語讀寫ê難度，但是揣著正確ê漢字，無疑誤會當提升咱對台語ê了解。 比如講，咱時常將華語ê「颱風」寫做風颱，不而過正確ê台語寫法應該是風篩，為啥物欲叫風篩？ 根據清治時期王禮主編ê《台灣縣志》對風篩的描寫，「颶風挾雨四面環至，空中旋舞如篩」，咱若看這馬ê天氣圖就會欽配古早文人ê智慧。 風篩閣較早是記載佇元曲·張國賓《薛仁貴》第二折「哎喲兒也，知他那裏日炙風篩，博功名苦盡甘來。」