高麗菜飯

 高麗菜飯 Ko-lê-chhài-pn̄g

昨昏(cha̋ng)用電子鍋煮一坩高麗菜飯，第一擺煮，歹撙節，水傷少，小可懸低粒。為著煮這頓，閣專工騎歐篼䆀去「里仁」，買無泡過藥水的金鉤蝦。

Cha̋ng iōng tiān-chú ko chú chi̍t khaⁿ ko-lê-chhài-pn̄g, tē-it-pái chú, phái-chún-chat, chúi siuⁿ-chió, sió-khóa koân-kē lia̍p. Ūi-tio̍h chú chit-tǹg, koh choan-kang khiâ ó͘-to͘-bái khì “Lí-jîn”, bé bô phàu kò io̍h-chúi ê kim-kau-hê.

歐篼䆀傷久無騎，發袂起來，創規晡，舞佮大粒汗細粒汗，牽去巷仔口頭下到的機車行，無開；閣牽去較起--去，菜市仔彼間，頭家講無電，伊會使幫我焐電 ，我騎看覓，敢會回電，若無，著愛換密底哩。

Ó͘-to͘-bái siuⁿ kú bô khiâ, hoat bē khí-lâi, chhong kui-po͘, bú kah tōa-lia̍p-kōaⁿ sè-lia̍p-kōaⁿ, khan khì hāng-á-kháu thâu-ē-kàu ê ki-chhia-hâng, bô khai; koh khan khì khah khí--khì, chhài-chhī-á hit-keng, thâu-ke kóng bô tiān, i ē-sái pang góa ù-tiān, góa khiâ khòaⁿ-māi, kám ē hôe-tiān, nā-bô, tō ài ōaⁿ ba̍t-té-lih.

想講若騎傷遠，予無電去，頭較大身，殘殘佮換落去，一時聳勢講，順紲規台巡巡看看咧，看佗位閣愛修理。換烏油、換擋車燈電火泡仔，算算咧，攏總開千外。這頓飯若無熟，毋就牽豬哥拍見錢-無采工。

Siūⁿ-kóng nā kháⁿ siuⁿ hn̄g, hō͘ bô tiān khì, thâu khah tōa sin, chhân-chhân kah ōaⁿ loh-khì, chı̍t-sî sáng-sè kóng, sūn-sòa kui tâi sûn-sûn khòaⁿ-khòaⁿ leh, khòaⁿ toh-ūi koh ài siu-lí. Ōaⁿ o͘-iû, ōaⁿ tòng-chhia-teng ê tiān-hóe-pho̍k-á, sǹg-sǹg-leh, lóng-chóng khai chheng-gōa. Chit-tǹg pn̄g nā-bô se̍k, m̄-tiō khan-ti-ko pháng-kìⁿ-chîⁿ bô-chhái-kang.

就去龜古，米心無透的半生熟飯欲安怎挽救？揣一霎仔久，有人講：噴一寡清酒閣煮，就好。照人講的試看覓，煮飯的開關一直跳保溫。閣龜古較斟酌咧，有人講：愛用電鍋，總算生米煮成熟飯。

Tō khì ku-kó͘(google), bí-sim se̍k bô-thàu ê pòaⁿ-chheⁿ-se̍k pn̄g beh-án-chóaⁿ bán-kiù? Chhōe chı̍t-tiap-á-kú, ū lâng kóng: phùn chı̍t-kóa chheng-chiú koh chú, tiō hó. Chiàu lâng kóng ê chhì-khòaⁿ-māi, chú-pn̄g ê khai-koan it-tı̍t thiàu pó-un. Koh ku-kó͘ (google) khah chim-chiok leh, ū lâng kóng: ài ēng tiān-ko͘. Chóng sǹg chheⁿ-bí chú-chiâⁿ se̍k-pn̄g.

毋過，清酒噴過頭，攏酒味，也無半絲金鉤蝦的芡芳味，真正是擔沙填海-了戇工。

M̄-kù, chheng-chiú phùn koh-thâu, lóng chiú-bī, iā bô pòaⁿ-si kim-kau-hê ê khiàn-phang-bī, chin-chiàⁿ sī taⁿ-soa thiām-hái liáu gōng kang.

..................

透濫(thàu-lām)華語ê解說(kái-soeh)：

昨昏，cha-hng，讀成連音（合音）cha̋ng

電子鍋，tiān-chú-ko。

坩，khaⁿ，鍋，計算鍋子的量詞。

撙節，chún-chat。

小可，sió-khóa。

懸低粒，koân-kē-lia̍p，米沒熟透的意思。

專工，choan-kang，專程。

歐篼䆀(o͘-to͘-bái)，日語外來語，オートバイ(ootobai)。華語式的台語寫成歐兜拜、歐兜賣，這裡用全台語觀點，暫時這樣寫，摩托車的意思。

頭下到，thâu-ē-kàu，首先到達的地方。

金鉤蝦，kim-kau-hê，「台南人叫蝦米，這馬綴台北人叫，看會當變作台北人袂？而且金鉤蝦聽起--來較厲害」

機車店，ki-chhia-tiàm，摩托車店，機車從華語借用過來的，台語很多都直翻華語，畢竟台語詞彙停止更新近百年了，跟歐篼䆀借用日語相同道理。

無開，bô khui。店沒開。「開khui、開開khui-khui、開開--開khui-khui--khui ê 開」。

較起--去，khah khí--khì，再往前一點的意思。相對於頭下到，要再遠一點。

焐電 ，ù-tiān，倚電 óa- tiān，接電、搭電、救電。

回電 ，hôe-tiān，騎乘時，讓電瓶回充。

密底哩 ，ba̍t-té-lih ，蓄電池。日語外來語バッテリー(batterii)

殘殘，chhân-chhân，狠下心。

聳勢，sáng-sè，這𥚃指展威風。「無錢假大範啦。」

順紲，sūn-sòa，順便。

佗位，toh-ūi，那𥚃。

擋車燈，tòng-chhia-teng，煞車燈。

電火泡仔，tiān-hóe-pho̍k-á，燈泡。

毋就，m̄-tiō，不就。

牽豬哥拍見錢-無采工。台語歇後語。拍見錢 ，phàng-kìⁿ-chîⁿ，遺失錢。無采工，bô-chhái-kang，枉費工夫。

開千外，khai chheng gōa，花一千多塊。開的文讀音，不同前面的無開。

龜古，ku-kó͘，英文google。

半生熟飯，pòaⁿ-chheⁿ-se̍k pn̄g，半熟飯。半熟蛋好吃，半熟飯很難吃。

一霎仔久，chı̍t-tiap-á-kú，一下子。

斟酌，chim-chiok，仔細。

電鍋，tiān-oe，這裡的鍋，唸oe，台語借用漢字常有同字不同音的缺點，這是一些前輩堅持要全羅馬字書寫的理由，不過為了讓大家看懂，還是先這樣吧。

生米煮成熟飯，煮成chú-chiâⁿ。

芡芳，khiàn-phang，爆香。

擔沙填海-了戇工，taⁿ-soaⁿ-thiām-hái liáu-gōng-kang，台語歇後語。